Sjósund - spennandi

Gaman að heyra um nýjasta sportið hjá þér Steini. Við fjölskyldan höfum verið svolítið á sjó hér í firðinum í sumar og núna í haust. Okkur finnst ekkert sérlega skemmtileg tilhugsun að synda  yfir fjörðinn þar sem við höfum verið að fylgjast með hnýsum og hrefnum.

Það er ótrúlega tilkomumikil sjón að sjá hrefnurnar að veiðum. Maður sér síldartorfur efst í yfirborðinu og allt í einu kemur svo hrefnan upp úr til að gleypa ætið. Þegar maður er staddur úti í miðjum firði verður hávaðinn mikill þegar þær skella í sjónum aftur. Hnýsurnar synda allt í kring og hirða leifarnar.

 Annars væri gaman að vita af því í tíma ef þú ætlar að láta verða af þessu, hef oft hugsað um þetta líka, en aldrei synt í sjó við Ísland.

Það er svo sem allt gott að frétta, búið að vera gott veður í haust en miklar rigningar undanfarna daga.

Innilegar hamingjuóskir til þess nýgifta á Héraði og til allra afmælisbarna sem við höfum ekki heyrt í .

Kveðja Gústi og Dísa

Athugasemdir

[Steini Thorst, 14.9.2008 kl. 21:19]

Hrefnur og Hnýsur já,.....hmm, ég held ég láti nú sundið alveg eiga sig meðan síldin er sem mest. Hnýsurnar kannski ekki svo ógnvænlegar en Háhyrningar hafa nú ansi oft fylgt Síldinni svo fyrri hluti sumars hljómar mun betur en sá seinni :)

Frétti reyndar um daginn að á svæðinu sem ég hef verið að synda í fyrir vestan, við Stykkishólm, hafi sést til 6-7 metra langs Hákarls svamlandi þar um :) Reyndar beinhákarl en ég held ég myndi samt ekki vilja mæta slíku kvikindi,..hehe

En já, ég læt þig vita í tíma og þú kemur með :-)